कोणीतरी असे पटापट…

कोणीतरी असे पटापट…

माझा मुलगा चि यश सतत काहीतरी ऑन लाईन मागवत असतो, कुरियर वाला आला नाही असा दिवस जात नाही. आता कालचेच पहा ना, दुपारी ४ वाजता यशचा फोन आला…

“बाबा, माझे एक अर्जंट पार्सल आज येणार आहे ते आले का ?”

“नाही आज कोणतेच कुरियर आले नाही”

“असे कसे, आज हे पार्सल नक्की यायला हवे होते”

“येईल रे, आत्ताशा ४ तर वाजताहेत, हे कुरियर वाले अगदी सात-आठ वाजे पर्यंत डिलिव्हरी करतात , अजून वाट आहे “

“ते ठीक, पण मला ते पार्सल आज मिळायलाच हवे”

“आता ते माझ्या हातात नाही”

“येस, पण तुम्ही होरारी एक्सपर्ट ना, मग तुम्हाला कळू शकेल ना आज डिलिव्हरी होईल का आणि ती केव्हा?”

“होरारी चार्ट? बेटा इतक्या लहान सहान, रूटीन कामासाठी होरारी चार्ट? नाही रे, होरारी तंत्राचा हा दुरुपयोग ठरेल, चेष्टा होईल “

“सगळ्या गावाचे भविष्य सांगता आणि आता माझ्या साठी नाही?“

“हे तर सरळ सरळ इमोशनल ब्लॅकमेलिंग आहे”

“येस इट इज, तेव्हा आज हमकू वो होरारी चार्ट मंगताच है”

सॉफ्टवेअर चालू केले आणि होरारी चार्ट तयार केला :

२४ जून २०२६, दुपारी ४:१२:२९ , पुणे, सायन, रिजिओमोनट्यानस

प्रश्नकर्ता (यश): वृश्चिक लग्न आहे, लग्नात कोणताच ग्रह नसल्याने, लग्नेश मंगळ आणि जातकाचा नैसर्गिक प्रतिनिधी चंद्र चि यश चे प्रतिनिधित्व करतील.

पार्सल: हे दोन प्रकारे पाहता येईल, आम्ही त्याचे पैसे मोजले आहेत त्यामुळे ती वस्तू आमच्या मालकीची आहे म्हणून ‘द्वितीय भावा’ वरून.

किंवा जो पर्यंत पार्सल आम्हाला डिलिव्हर होत नाही तो पर्यंत ते पार्सल पाठवणाऱ्या कुंपणीच्या मालकीचे मानले जाईल , जर पार्सल डिलिव्हर होऊ शकले नाही / डिलीव्हरी नाकारली गेली तर ते कुंपणीची वस्तू म्हणून कुंपणी कडे परत जाईल. त्यानुसार विक्रेत्याच्या द्वितीय भावा वरून म्हणजेच अष्टम भावा वरुन देखील पार्सल चा विचार होऊ शकतो.

पत्रिकेत द्वितीय भावावर धनु रास आहे, द्वितीयात कोणताही ग्रह नाही म्हणजे द्वितीयेश गुरु पार्सल चे प्रतिनिधित्व करेल. या गुरूचे मंगळ अथवा चंद्राशी होणारे योग सांगतील की हे पार्सल मिळणार का? आणि केव्हा?

सप्तमातला वृषभेतचा मंगळ (यश) आणि नवम स्थानातल्या कर्केतल्या गुरु (पार्सल) यांच्यात 2 अंशात लाभ योग होत आहे. गुरु (पार्सल) आणि चंद्र (यश) यांच्यातही नवपंचम होत आहे, पार्सल मिळणार, आजच!

दुसऱ्या विचारा नुसार विक्रेत्याचे द्वितीय स्थान म्हणजे अष्टम स्थान, इथे मिथुन रास आहे, अष्टमात रवी आहे म्हणजे रवी आणि बुध पार्सल चे प्रतिनिधित्व करत आहेत.बुध (पार्सल) नवम स्थानात आहे आणि सप्तमात असलेल्या मंगळाशी (यश) 1:41 अंशात लाभ योग करत आहे. चंद्र (यश) – बुध (पार्सल) आणि चंद्र (यश) – रवी (पार्सल) यांच्यातही योग होत आहेत. पार्सल मिळणार, आजच!

तिसरा विचार हा की बुध जर पार्सल चा प्रतिनिधी मानला तर तो जन्मलग्न बिंदू (यश) शी योग करणार आहे, जन्मलग्न बिंदू 23:02 वृश्चिक वर आहे, तो बिंदू 25:11 वृश्चिकेवर आला की त्याचा बुधाशी चा २ अंशात नवपंचम योग होईल.

इतकी कन्फर्मेशनस असताना आज पार्सल मिळाले नाही तर आश्चर्य!

पार्सल मिळणार हे नक्की. पण केव्हा? आता पार्सल येणार हे सांगणारे सर्व योग 1.5 ते 2 अंशात असल्याने, साधारण 2 अंश हे परिमाण असेल, म्हणजे 2 मिनिटे- 20 मिनिटे – 2 तास – 20 तास असे कालमापन होऊ शकते. 2 मिनिटे , 20 तास अव्यवहार्य आहे, 20 मिनिटे का 2 तास?

बराच विचार करून मी 2 तास हे युनिट निश्चित केले. 4:12 PM ची पत्रिका होती, त्यात दोन तास मिळवले तर 6:12 PM होतात, तेव्हा साधारण पाने 6 च्या सुमारास पार्सल हातात पडेल असा निष्कर्ष मी काढला.

**** पार्सल बरोबर 6 : 03 PM ला हातात पडले. ****